بابەتی زیاتر


ئەرکی ئۆپۆزسیۆن
09/28/2019 15:50:45
کاتی بیرکردنەوە
07/04/2019 09:38:58
بۆچون و باوەڕ
06/09/2019 19:35:55
وەرزی هەڵوەرینی حزبەکان
05/17/2019 10:50:16
ماركس- فیورباخ- ڕه‌خنه‌ی ئاین
05/10/2019 12:00:20

وەرزی هەڵوەرینی حزبەکان

ئارام هادی
ئارام هادی


ئارام هادی/ به‌شی یه‌كه‌م
٭ یەکێک لە دەستکەوتەکانی ئاشبەتاڵی 1974نەمانی تاک حزبی بو لە ناوەندی بڕیاری (سیاسی. سەربازی.  کۆمەڵایەتی) لەناوخۆی کوردستان و هاوکات پەیوەندیەدەرەکیەکانی باشوری کوردستان بەجیهانی دەرەوە، لێرەوە هەلی دروستبونی فرەحزبی ڕەخسا و لە ڕۆژگاری ئەمڕۆشماندا زیاتر لە چل حزبمان هەیە، بە پێوەرە دیموکراسیەکانیش بێت، بونی فرەحزبی لە هەرشوێنێک واتای جێبەجێکردنی بڕگەیەکە لە سیستەمی حوکمڕانیەکی تەندروست و باش، لەلایەکیترەوە فرەحزبی واتای یەکترقبوڵکردن و دەستاودەستکردنی دەسەڵات و بونی زیاتر لەپرۆژە و ئەقڵێکە بۆ خزمەتکردنی خەڵک و هاوکات یەکگرتوویی و یەکگوتاریە لەئاست پرسە نەتەوەیی و نیشتمانیەکاندا و گێڕانەوەی بەهایە بۆ تاکەکان و دوورخستنەوەی مەترسیە دەرەکیەکانە و دەستەبەرکردنی پێشکەوتنە لە کۆی سێکتەرەکانی وڵاتدا، حزبەکان مافی ململانێیەکی تەندروستیشیان هەیە کەمەبەست لێی بۆ پێشکەوتنی کۆمەڵگابێت و هاندانی خەڵک بێت بۆ خۆشویستن و پارێزگاری لە خاکەکەیان و دواجار دەبێت خاوەن پلانی تۆکمە و ستراتیژێکی ڕوونی دوورمەودا و پرۆژەیەکی نیشتمانی بن و چی و چیتر.

پێویستیشە بزانین ئەم حزبانەی ئێستای باشوری کوردستان ئەو خاڵانەیان تاچەند جێبەجێکردوە؟، کە لەسەرەوە ئاماژەم پێدابو، یا حزب گەلێک بون خاڵی بون لە پشودرێژی و گیانی مراوغە و نەبونی پلانی تۆکمە بۆ ڕووبەڕووبونەوەی گەندەڵی و هاوکات تاچەند ڕێگربون لەبەردەم دەستوەردانی دەرەکی؟.

٭بە سادەترین زمان، حزبەکانی باشوری کوردستان نەیانتوانیوە ئەوەبن کە خەڵک دەیەوێت!، واته‌ نه‌یانتوانی خزمه‌تی خه‌ڵك بكه‌ن و نه‌شیانتوانی هه‌رێم به‌ره‌ و كه‌ناری ئارامی به‌رن ئه‌مه‌ش له‌كاتێكدا ده‌یانتوانی وابن، به‌پێچه‌وانه‌شه‌وه‌ له‌ ململانێی یه‌كتر شكاندن و ناشیرینكردنی به‌رامبه‌ر و له‌ده‌ستدانی متمانه‌ی خه‌ڵك به‌رامبه‌ر خۆیان و گۆڕینی هه‌رچی جوانی هه‌یه‌ به‌ پۆخڵه‌واتیه‌كان و هێرشكردنێكی ناڕه‌وا بۆسه‌ر یه‌كتر و بڵاوكردنه‌وه‌ی ڕه‌شبینی و مراندنی گیانی گۆڕانكاری و چه‌واشه‌كردنی ڕایگشتی و له‌ هه‌ڕاجكردنی شكۆی تاكدا چیان له‌ده‌ست هات به‌ زیاده‌وه‌ كردیان له‌كاتێكدا ده‌شیانتوانی وانه‌بن.

*ده‌سه‌ڵات و ئۆپۆزسیۆن
هەرچەندە بون بەدەسەڵات و ئۆپۆزسیۆن نەخۆشی ئیفلیجی نیە تا کۆتایی لەو بەرگەدا بمێنیتەوە و چارەنوسی خۆتی پێ بسپێریت، بەڵام دەرکەوتنی ئۆپۆزسیۆن و جێگرتنەوەی لەدەسەڵاتدا، بەو میکانیزمە هەڵە و خێرایە ڕوونادات بەتایبەت لەوڵاتە داخراوەکاندا، بڕینی هەنگاوەکان لە ئۆپۆزسیۆنەوە بۆ دەسەڵاتیش لە (ئیرحەل و بڕوخێ و ڕەش و سپی و ڕەنگەکانیتریش هەر بەڕەش بخوێنیتەوە و هەڵواسینی بەرپرسەکان بە بەردەرکی سەرادا نایەتەدی)، ئۆپۆزسیۆن بون پلان و بەرنامەی وردی زانستی و تۆکمە و خەتێکی میانڕەوی دەوێت، خستنه گەڕی میدیایی ناوێ تا هەرچی جوانی ئەم هەرێمە هەیە لەبەر چەند بەرپرسێکی گەندەڵدا بیسوتێنی.

لەبەرامبەریشدا بەداخەوە دەسەڵات نەیتوانی یا نەیویست، سود لە بەرەی ئۆپۆزسیۆن ببینێت و بیکاتە بەرمەبنای خۆ چاککردن و گیانی گۆڕانکاری ڕیشەیی لەسیستەمی حوکمڕانیدا، حزبە ئۆپۆزسیۆن و دەسەڵاتدارەکانیش جگە لە زەقکردنەوەی جیاوازی بۆچونەکانیان، نەیانتوانی خاڵی هاوبەشی نێوانیان بدۆزنەوە و پێکەوە درێژە بە حوکمڕانی بدەن، لەبری ئەمە ئۆپۆزسیۆن هەوڵی ڕەشکردن و ناشیرنکردن و دەرپەڕاندن و مل لێکردنەوەی دەسەڵاتی دەدا، دەسەڵاتیش هەوڵی پوکانەوە و هەڵوەشاندنەوە و لێکترازانی ڕیزەکانی ئۆپۆزسیۆن و دواجار قوتدانی دەدا، هەردوولاش بێ ئاگابون لەوەی ئەم هەرێمە پێویستی بە هەردوکیان هەیە واتە (حوکمی ڕەشید و ئۆپۆزسیۆنی ئاقڵ و مۆدێرن)، دەبێت ئەوەشمان بیرنەچێت، بەرپرس و کادری خوارەی حزبە دەسەڵاتدارەکان هەموویان شەیتان نین، وەک چۆن بەرپرس و کادری حزبە ئۆپۆزسیۆنەکانیش هەموویان ڕەحمان نین، لە هەردووکیاندا کەسی باش و خەمخۆرهەن، کەسی گەندەڵیش هەن.


 به‌شی دووه‌م

٭دواین هەڵبژاردن و هەڵوەرینی ئۆپۆزسیۆن
ڕێژەی بەشداریکردن لە دەنگدان بۆ پەرلەمانی کوردستان، بەپێی ڕاگەیەندراوی کۆبونەوەی کۆمسیۆنی باڵای هەڵبژاردنەکانی کوردستان کە بەرواری 2018/10/20ی لەسەرە ڕێژەکە بە (1,845,975)هەژماردەکات، کە دەکاتە 59%ی کۆیگشتی دەنگدەرانی هەرێمی کوردستان، هەرچەندە گومانێکی زۆر لەم ڕێژەیە هەیە و هەندێک سەرچاوەیتر ئاماژە بە لەخوار 50%ده‌كه‌ن، به‌م جۆره‌بێت زۆرینه‌ی خه‌ڵكی كوردستان هیچ حزبێكیان به‌شایسته‌ی ده‌نگه‌كانیان نه‌زانیوه‌، ئه‌مه‌ش سەلمێنەری ئەو ڕاستیەیە کە ئۆپۆزسیۆن متمانەی خەڵکی لەدەستداوە بەهۆی ئەوەی نەیانتوانی دروشمەکانیان جێبەجێ بکەن و لە بازنەیەکی تەنگ و داخراودا خەریکی سیاسەتی تەکتیکی ڕۆژانەی هەرزان بون و خاوەن ڕوئیایەکی گشتگیر و ستراتیژی نەبون، هاوکات لەزۆر کایەدا شوێن هەردوو حزبی دەسەڵات کەوتبون و مۆدێلێكی جیاوازیان نه‌هێنایه‌ ناو سیسته‌می حزبایه‌تی له‌ كوردستاندا.

ئەمەش وایکرد بەشێکی كه‌میش لە دەنگدەری ئۆپۆزسیۆنی پێشوو دەنگ بدەنەوە بە یەکێتی و پارتی و بەشی زۆریشیان ڕۆژی دەنگدانیان لە ماڵەکانی خۆیاندا بەسەر بردوو نەهاتنە سەر سندوقی دەنگدان، دوای هه‌ڵبژاردنه‌كه‌ش ئومێد له‌ ناو بێ ئومێدی هه‌بو كه‌ بۆ چوارساڵی داهاتو ئۆپۆزسیۆنێكی به‌هێز به‌ ئه‌قڵێكی كراوه‌ و مۆدێرن به‌ سیاسه‌تێكی ڕوون و درێژخایه‌ن ئومێد بگه‌ڕێنێته‌وه‌ بۆ ئه‌و كه‌سانه‌ی ڕۆژی ده‌نگدانی په‌رله‌مانی كوردستانیان له‌ماڵه‌وه‌ به‌ڕێكرد و بۆ چوار ساڵی داهاتو بێنه‌وه‌ سه‌ر سندوقی ده‌نگدان و لیست و به‌ربژێری خواستی دڵی خۆیان هه‌ڵبژێرن، به‌ڵام هه‌ر زوو ئه‌م خه‌ونه‌ش خرایه‌وه‌ ژێرخاك و ئیدی بۆ ئه‌به‌د ئۆپۆزسیۆنی ڕابردوو ناتوانن باوه‌ڕ به‌ ڕایگشتی بهێنن و شه‌قام بجوڵێنن، ڕه‌نگه‌ خۆشیان ئه‌مه‌یان باشتر لاڕوون بوبێت بۆیه‌ هه‌موو هه‌وڵی گۆڕان ڕێككه‌وتن بو له‌گه‌ڵ حزبێك بۆ چونه‌ حكومه‌ت كه‌ له‌سه‌رده‌ستی ئه‌م حزبه‌ (دامه‌زرێنه‌ر و سه‌ركرده‌كه‌ی له‌دوای دووساڵ له‌ وه‌فاتیشی تا ئێستا حوكمی گرتنه‌كه‌ی له‌ دادگا هه‌ڵنه‌وه‌شاوه‌ته‌وه‌، هاوكات هه‌ر له‌سه‌ر ده‌ستی ئه‌م حزبه‌ له‌ مانگی 10ی 2015ده‌رگای په‌رله‌مانیان به‌سه‌ردا داخستن و به‌ فراكسیۆنی په‌رله‌مانی و وه‌زیره‌كانیانه‌وه‌ نه‌قڵی سلێمانی كرانه‌وه‌)، هه‌رچی كۆمه‌ڵی ئیسلامیشه‌ سه‌ره‌ڕای فه‌رموو لێنه‌كردنیان بۆ به‌شداری له‌ حكومه‌ت تا ئێستاش خۆیان له‌ چاوه‌ڕوانیدا هێشتۆته‌وه‌، به‌شی زۆری كێشه‌ ناوخۆییه‌كانی ئه‌و دوو حزبه‌ش هۆكاره‌كه‌ی هه‌ر ئه‌مه‌یه‌، كه‌ سیاسه‌تێكی ڕوونیان نیه‌ و چاوه‌ڕێی كات ده‌كه‌ن.

ئه‌مه‌ له‌كاتێكدا حزبی سیاسی ده‌بێت بۆ ناوخۆی هه‌رێم خاوه‌ن پرۆژه‌بن بۆ هه‌ر ڕووداوێك كه‌ دێته‌ پێش و (چاوه‌ڕێی كات نه‌كه‌ن) به‌ڵكو كات دروست بكه‌ن بۆ جێبه‌جێكردنی و بیكه‌نه‌ ڕۆژه‌ڤی سه‌ره‌كی و لێی پاشگه‌زنه‌بنه‌وه‌ وه‌لێ پشوو درێژی ده‌وێت، وه‌ تاقه‌ی ململانێی ته‌ندروستی هه‌بێت بۆ گۆڕینی دۆخی چه‌قبه‌ستوی هه‌ر وڵاتێك و بیبات به‌ره‌ و كه‌ناری ئارام، هاوكات بۆ ده‌ره‌وه‌ش حزبه‌كان ده‌بێت به‌یه‌ك پاكێجی هاوبه‌ش پرۆژه‌یه‌كی نه‌ته‌وه‌یی و نیشتمانی كۆیان بكاته‌وه‌ و تیایدا ده‌ست نیشانی هێڵه‌ سوره‌كان بكه‌ن و خاوه‌ن قسه‌بن و توانای گۆڕانكاریان له‌ ده‌ره‌وه‌ی سنوره‌كانی هه‌رێم هه‌بێت، به‌تایبه‌ت بۆ ئه‌م ناوچه‌یه‌ی ئێمه‌ كه‌پێی ده‌وترێت ڕۆژهه‌ڵاتی ناوه‌ڕاست و به‌هۆی ده‌وڵه‌مه‌ندی ژێرخان و گه‌نجی سه‌رخانه‌كه‌یه‌وه‌ هه‌میشه‌ بۆته‌ ئه‌و شوێنه‌ی ململانێ جیهانییه‌كان تیایدا باڵاده‌سته‌، دواجار به‌دیلی قۆناغه‌كه‌یان پێبێت، نه‌ك وه‌ك ئۆپۆزسیۆنی خۆمان هه‌رچی گه‌نده‌ڵی هه‌یه‌ هه‌ڵیاندایه‌ سه‌ر شاشه‌ی ته‌له‌فزیۆنه‌كان و هیچ به‌دیلێكیشمان نه‌بینی، تادواجار خۆشیان ته‌سلیمی ئه‌مری واقع بون.

هه‌ر حزبێك به‌تایبه‌ت ئۆپۆزسیۆنه‌كان له‌سه‌ر ئه‌و به‌رنامه‌یه‌ نه‌ڕۆن له‌ ناو خودی خۆیاندا توشی شڵه‌ژان ده‌بن و ئه‌مه‌ش واده‌كات (دۆست و لایه‌نگر و ده‌نگده‌ر و ئه‌ندام و كادر)ه‌كانیان لایان ڕوون ده‌بێت كه‌ سه‌ركردایه‌تیه‌كه‌یان ئیفلاسی سیاسیان ڕاگه‌یاندوه‌ و توانای به‌ره‌نگاری و سوربونیان له‌سه‌ر به‌رنامه‌ سیاسیه‌كه‌ی پێشویان نه‌ماوه‌ و به‌دوای ده‌ستكه‌وتی هه‌رزانی مادی و جێ پێ قایمكردنن بۆخۆیان، لێره‌شدا دۆزینه‌وه‌ی جیاوازی له‌ كارنامه‌ی حزبه‌كاندا ئاسته‌م ده‌بێت و هه‌موویان له‌یه‌ك ده‌چن.

حزبایه‌تی سه‌ركردایه‌تی به‌پلان و چاونه‌ترس و ئازای ده‌وێت، كه‌ توانای چه‌سپاندنی به‌رنامه‌كه‌ی هه‌بێت له‌پێشخستنی كۆمه‌لگادا، به‌ربه‌ستیش دروست بكات له‌به‌رده‌م ئه‌و كێشانه‌ی كه‌ وڵات به‌ره‌ و وێرانی و دابڕان و قه‌یران ده‌به‌ن، به‌ڵام به‌داخه‌وه‌ زیاتر له‌و چل حزبه‌ی باشوری كوردستان له‌چه‌ند وێستگه‌یه‌كی گرنگ و چاره‌نوس سازی ئه‌م هه‌رێمه‌ جگه‌ له‌ له‌یه‌كچون هیچیترمان لێ نه‌بینین، له‌كاتێكدا پارتی دیموكراتی كوردستان به‌رده‌وام بو له‌ بڕیاره‌ هه‌ڵه‌كانی و ئه‌مانیش به‌دوایدا پێشبڕكێیان ده‌كرد، بۆ پشتڕاستكردنه‌وه‌ی ئه‌م قسانه‌ش چه‌ند نمونه‌یه‌ك ده‌هێنینه‌وه‌.

ئه‌و بڕیاره‌ هه‌ڵانه‌ی پارتی دیموكراتی كوردستان، كه‌ هه‌رێمی كوردستانی به‌ره‌ و هه‌ڵدێربرد و هیچ حزبێكیش نه‌یتوانی له‌به‌رده‌میدا بوه‌ستێته‌وه‌ جگه‌ له‌ هات و هاواری كادره‌كانیان له‌ ڕاگه‌یاندنه‌كان، ئه‌ویش زیاتر بۆ وه‌رگرتنی پشك بو بۆ حزبه‌كانیان.
1. مۆركردنی گرێبه‌ستی په‌نجا ساڵه‌ی وزه‌ له‌نێوان (هه‌ولێر و ئه‌نقه‌ره‌) له‌ساڵی 2010 له‌سه‌ر ده‌ستی نێچیرڤان بارزانی، ئه‌مه‌ له‌كاتێكدا له‌و كاته‌دا هیچ پۆستێكی حوكمیشی نه‌بوو!!.
2. فرۆشتنی نه‌وت به‌سه‌ربه‌خۆ و به‌بێ گه‌ڕانه‌وه‌ بۆ بغداد له‌ساڵی 2014، ئه‌م بڕیاره‌ش بوه‌ هۆی بڕینی بودجه‌ی هه‌رێم له‌لایه‌ن بغداده‌وه‌ و ئه‌مه‌ش وایكرد هه‌رێمی كوردستانی ڕووبه‌ڕووی قه‌یرانی دارایی قوڵ كرده‌وه‌، وایلێهات حكومه‌ت توانای دابینكردنی موچه‌ی نه‌بو له‌كاتی خویدا و مانگ له‌30ڕۆژه‌وه‌ هه‌ڵكشا تا 70ڕۆژ، ئه‌مه‌ جگه‌له‌وه‌ی سیسته‌می پاشه‌كه‌وت ڕاگه‌یه‌ندرا و كه‌ ئێستاش به‌هۆی ئه‌و بڕیاره‌ هه‌ڵه‌یه‌وه‌ حكومه‌ت زیاتر له‌ 10میلیار دۆلار قه‌رزاری موچه‌خۆرانیه‌تی.
3. كێ سوپای توركیای هێناوه‌ته‌ باشوری كوردستان و كارئاسانیان بۆ ده‌كات بۆ لێدان له‌ قه‌ندیل و جاسوسی كردن به‌سه‌ر خه‌ڵكی هه‌رێمه‌وه‌، ده‌بێت هه‌ر ئه‌و حزبه‌ش ئه‌و سوپایه‌ وه‌ده‌رنێت، به‌ڵام به‌داخه‌وه‌ دیاره‌ تا ئێستاش پارتی نیه‌تی ده‌ركردنی ئه‌و سوپایه‌ی نیه‌ و حزبه‌كانیتریش هیچ هه‌وڵێكیان نه‌داوه‌ و نه‌یانتوانیوه‌ فشارێكی جدی له‌سه‌ر پارتی و سوپای توركیا دروست كه‌ن.

4. ڕیفراندۆم، تائێستا و بۆ هه‌میشه‌ش ڕیفراندۆم به‌ پرۆژه‌ی توركی لای من ده‌مێنێته‌وه‌ بۆ له‌گۆڕنانی ئامانجه‌ باڵاكانی كورد (كه‌ ئێستا كاتی باسكردنی نیه‌ و له‌داهاتودا قسه‌مان له‌سه‌ری ده‌بێت وه‌ك چۆن پێشتریش هه‌مان بوه‌)، ڕیفراندۆم وه‌ك بڕیارێكی تاك لایه‌نه‌ی پارتی و به‌شێك له‌ سه‌ركردایه‌تی یه‌كێتی دواجار هه‌موو حزبه‌كان ڕه‌گه‌ڵی كه‌وتن، كه‌سێك یا حزبێك كه‌ پرۆژه‌ی نه‌بو یه‌كسانه‌ به‌وه‌ی بۆ هه‌موو پرسێك شوێن قه‌ره‌باڵغی بكه‌وێت!!.

6. یاسای سه‌رۆكایه‌تی هه‌رێم، بزوتنه‌وه‌ی گۆڕان به‌ پرۆژه‌یه‌كی جوانتر له‌وه‌ی پارتی ده‌یویست، یاسای سه‌رۆكایه‌تی هه‌رێمی تێپه‌ڕاند!!، بۆچی له‌ 2015ه‌وه‌ چاوشێركێمان له‌گه‌ڵ ده‌كات، گه‌رله‌ ڕابردوودا په‌نجه‌ی خه‌تا بۆ پارتی ڕاكێشرابێت له‌ داخستنی ده‌رگای په‌رله‌مان و ئیفلیجكردنی حكومه‌ت، ئه‌وا ئێستاش حه‌قی خۆیه‌تی تاوانه‌كه‌ بخرێته‌ سه‌ر گۆڕان.

به‌شێكی زۆری كێشه‌ ناوخۆییه‌كانی ئێستای بزوتنه‌وه‌ی ئیسلامی و كۆمه‌ڵی ئیسلامی و گۆڕان، بۆ ئه‌وه‌ ده‌گه‌ڕێته‌وه‌ كه‌ له‌ڕابردوودا نه‌یانتوانی هیچ گۆڕانێكی ڕیشه‌ییی دروست بكه‌ن و نه‌شیانتوانی ببنه‌ فشارێكی جدی بۆ سه‌ر ده‌سه‌ڵات، له‌دواجاریشدا (دۆست و لایه‌نگر و ده‌نگده‌ر و ئه‌ندام و كادر)ه‌كانیان تێگه‌یشتن كه‌ سه‌ركرده‌كانیان هه‌مان تێڕوانینیان بۆ سیسته‌می حوكمڕانی هه‌یه‌ كه‌ ده‌سه‌ڵات هه‌یه‌تی، ئه‌مه‌ش هۆكارێكی سه‌ره‌كی بو بۆ هه‌ڵوه‌رینی حزبه‌كانیان كه‌ له‌به‌شێكیتردا باسی ده‌كه‌ین

 به‌شی سێ یه‌م و كۆتایی

له‌هه‌موو وڵاتێكدا ئۆپۆزسیۆن چه‌ند شه‌قاوێك له‌ پێش ده‌سه‌ڵاته‌وه‌یه‌، به‌و حوكمه‌ی ده‌سه‌ڵاتداره‌كان تێوه‌ده‌گلێن له‌ كۆمه‌ڵێك مه‌له‌فی (گه‌نده‌ڵی ئه‌منی و ئیداری)، لێرەش بەپێچەوانەوە دەسەڵات زۆر لەپێش ئۆپۆزسیۆنە ئەمەش بۆ نەبونی پلان و کارنامەی تۆکمە دەگەڕێتەوە و لەزۆرپرسیشدا خەڵک ناتوانێ بەئاسانی ئۆپۆزسیۆن و دەسەڵات لێک جودابکاتەوە، لەبەر تێڕوانینی هاوبەشیان بۆ پرسەگرنگ و چارەنوس سازەکان.

ئێستانا به‌ڵكو زه‌مانێكه‌ سیاسەتیان له‌باشووری كوردستاندا ناشیرنكردوه‌ و هه‌رچی هات ته‌نها باری سه‌رشانی سیاسه‌تی قورستر و پیستركرد، بەڵام نەوەی نوێ پەڕ و باڵی پێوەنەهێشت، وایکرد کە خەڵک قێزی لێ بکاتەوە و هاوکات ترسی زیاتری خستە دڵی کاندیدی هەڵبژاردنەکانی داهاتوی سەرجەم حزبەکانەوە، کە زۆر زیاتر ئاگاداری خۆیان بن به‌جۆرێك هه‌ست به‌ترس بكه‌ن نه‌كا له‌ماڵه‌كانی خۆشیاندا بكرێنه‌ مشكی تاقیگه‌!!.

هه‌ڵوه‌رینی حزبه‌كان
له‌ پرسه‌ گرنگ و چاره‌نوس سازه‌كانی تایبه‌ت به‌م هه‌رێمه‌ی خۆماندا له‌وانه‌ش (گرێبه‌ستی په‌نجا ساڵه‌ی نه‌وت له‌گه‌ڵ توركیا. فرۆشتنی نه‌وت به‌سه‌ربه‌خۆ و بێ گه‌ڕانه‌وه‌ بۆ بغداد. پرسی مانه‌وه‌ی سوپای توركیا له‌ باشوری كوردستان و ده‌ستوه‌ردانه‌ به‌رده‌وامه‌كانی توركیا بۆسه‌ر باشوری كوردستان. ڕیفراندۆم)، كه‌ حه‌تمه‌ن هه‌ر یه‌كێك له‌م بڕیاره‌ هه‌ڵانه‌ لێكه‌وته‌ی زۆر خراپی به‌سه‌ر خه‌ڵكه‌وه‌ جێهێشتوه‌ و به‌شێكیشیان خه‌ته‌ری جدی له‌سه‌ر ئاسایشی نه‌ته‌وه‌یی دروستكردوه‌، نه‌مانبینی حزبه‌ ئۆپۆزسیۆنه‌كان له‌به‌رده‌م بڕیاری حزبه‌ ده‌سه‌ڵاتداره‌كاندا وه‌ك پۆڵا بچه‌قن و له‌ بڕیاره‌ هه‌ڵه‌كانیان په‌شیمانیان بكه‌نه‌وه‌ وه‌ك ئه‌مه‌یان نه‌كرد، ئه‌ركی چالاكوان و ڕێكخراوه‌ مه‌ده‌نیه‌كانیان قورستركرد، بۆ ئه‌مه‌ش ئه‌رشیفی شه‌قام شایه‌ده‌ كه‌ چالاكوان و ڕێكخراوه‌ مه‌ده‌نیه‌كان چ ڕۆڵێكیان گێڕا و هیچ كات بێده‌نگ نه‌بونه‌ و به‌رده‌وام هه‌وڵی دروستكردنی فشاریان له‌سه‌ر حزبه‌ حوكمڕانه‌كان دروستكردوه‌، كه‌ به‌داخه‌وه‌ حزبه‌ ئۆپۆزسیۆنه‌كان ته‌نانه‌ت هانی ئه‌ندام و لایه‌نگرانی خۆشیان نه‌ده‌دا پاڵپشتی له‌م هه‌وڵانه‌ی شه‌قام بكه‌ن كه‌ له‌لایه‌ن چالاكوان و ڕێكخراوه‌ مه‌ده‌نیه‌كانه‌وه‌ سازده‌درا.

له‌لایه‌كیتره‌وه‌ به‌شی هه‌ره‌ زۆری حزبه‌كان له‌ ژووره‌ داخراوه‌كاندا له‌ سه‌ر پرسه‌ هه‌نوكه‌ییه‌كان به‌ باش بۆبێت یا خراپ ڕێكده‌كه‌وتن و هه‌ندێك جار هانی فراكسۆنه‌كانی خۆشیان له‌ په‌رله‌مان داوه‌ ده‌نگ به‌ تێپه‌ڕبونی یاسا چه‌وته‌كان بده‌ن، به‌ڵام بۆ چه‌واشه‌كاری په‌رله‌مانتاره‌كانیان ده‌نارده‌ سه‌رشاشه‌ی ته‌له‌فزیۆنه‌كان و په‌یامی دووفاقیان به‌ گوێی خه‌ڵكدا ده‌دات، بێ ئاگا له‌وه‌ی ئه‌قڵیه‌تی خه‌ڵك له‌پێش ئه‌وانه‌وه‌ بوه، پاداشتی خه‌ڵكیش بۆ ئه‌م جۆره‌ سیاسه‌ته‌ی حزبه‌كان بایكۆتی هه‌ڵبژاردن بو.

پەیامی دوا هەڵبژاردن و زه‌نگی ترسناك بۆ هه‌موان.
پێشتر وتمان دەسەڵات لەپێش ئۆپۆزسیۆنەوەیە، خۆشبەختانەش ئەقڵی خەڵک لەپێش هەردوکیانەوەیە، هەرئەمەش وایکرد خەڵکی کوردستان لەدواهەمین هەڵبژاردنی پەرلەمانی کوردستاندا پەیامێک بە گوێی دەسەڵات و ئۆپۆزسیۆندا بدات و نیوەزیاتری دەنگدەرانی کوردستان نەچونە سەرسندوقی هەڵبژاردن و لەماڵەکانی خۆیاندا مانەوە، ئه‌م ده‌نگده‌رانه‌ش وه‌ك چۆن ڕه‌قیبن به‌سه‌ر ده‌سه‌ڵاته‌وه‌ و چاوه‌ڕێن بزانن تاچه‌ند كارنامه‌ی هه‌ڵبژاردنه‌كانیان له‌ماوه‌ی حوكمڕانیدا جێبه‌جێده‌كه‌ن، ئاواش ڕه‌قیبن به‌سه‌ر ئۆپۆزسیۆنه‌وه‌ و چاوه‌ڕێن مۆدێلێكیتری ئۆپۆزسیۆنبون ببینن، كه‌ دووربێت له‌ ژاوه‌ژاو و به‌رنامه‌ی جیاواز له‌ده‌سه‌ڵاتی هه‌بێت بۆ چاره‌سه‌ری. گه‌رنا دۆخه‌كه‌ به‌جۆرێك ده‌شێوێت كه‌ به‌ ده‌سه‌ڵات و ئۆپۆزسیۆن چاره‌سه‌رنه‌كرێت و وای لێدێت وه‌ك په‌نده‌ كوردیه‌كه‌ ده‌ڵێت "سه‌گ ساحێبی خۆی نه‌ناسێته‌وه‌"، ئه‌مه‌ش واده‌كات سنوره‌كانی هه‌رێم له‌ئێستا واڵاتربن له‌به‌رده‌م داگیركه‌راندا و ئه‌نجامه‌كه‌شی به‌ خۆڵه‌مێشكردنی هه‌رێمی لێ ده‌كه‌وێته‌وه‌.

05/17/2019 10:50:16 | 312 | Print Friendly and PDF