بابەتی زیاتر


كاریگەری شەڕ بەسەر فیلم‌و دراماكانمانەوە دیارە
05/06/2019 11:32:53
مۆڵەتی شۆفێری لە نێوان سیستەم و یاسادا
05/03/2019 19:44:55
ڤیستیڤاڵی ڕەنگەکان لەکوێوە دژایەتیدەکرێت؟
04/06/2019 20:37:41
فڕینەکانی جەمشیدخانی مامم
03/02/2019 18:01:05
کوڕێکی دەست ڕەنگین لەسەردەمی دیکتاتۆرێکدا
02/21/2019 18:32:05

كاریگەری شەڕ بەسەر فیلم‌و دراماكانمانەوە دیارە

دێرین عەلی
دێرین عەلی


ئامادەكردنی: عەتا حەمەساڵح

لەدیدارێكی تایبەتی بە ژیانەوەدا دێرین عەلی وەك دەرونناسێك باسی لەپرۆژەكانی خۆی كردوو پەیوەندی هونەرەكان بەدەروونناسییەوە‌و رۆڵی هونەر لەكایە دەروونیەكاندا. دێرین ووتی" ئەوكاتەی داعش كۆمەڵێك خەڵكی ئاسایی كردە ئامانجە قێزەونەكانی ئەوەبوو ئێمە كە كۆمەڵێك گەنج بووین هەستاین بەئەنجامدانی چالاكیەك بۆ كەمپی ئاشتی ئەوەی دركمان پێكرد بۆ هێوربوونەوەی باری دەروونی خەڵكەكە هونەربوو كە بە پێشكەشكردنی میوزیك لەهەمان كاتدا ئامادەكاری ئەوەمان كرد كە مناڵەكان لەڕوی وێنەكێشانەوە سایكۆلۆجییان بخوێنینەوە .. لەئەنجامدا ئەوەی بۆمان دەركەوت كاریگەری راكردن‌و كوشتنی خەڵك‌و نەبوونی ماڵێك، ڕەنگدانەوەی لەسەر وێنەكان هەبوو، لەهەمووی سەرنج راكێشتر  ئاماژەیەك بۆ ئارامی‌و بیركردنی دایك‌و باوكیان‌و نەبوونی سەوزایی بوو، بۆیە هونەر تاكە رێگەیە بۆ ناسینی باری دەروونی تاكەكان‌و كاركردن لەسەریان".

هەروەها وتیشی" كاری دەروونناسی هەنگاوی ووردی دەوێت ، ڕێكخستنی شتەكان بەتاكێك نابێت ، ئەبێ پلان‌و هەنگاوی جدی بۆ بنرێت، لەوڵاتی ئێمە كار بۆ دەروونناسی نەكراوە تا تێكەڵەیەكی زانستی لەم جۆرە بكرێت، بەڵام من بە ئومێدم هەنگاوی باش لەم دوو بوارە بنرێت تا بتوانین، لەرێگەی هونەرەوە سایكۆلۆژی تاك دیاری بكرێت".

خاتوو دێرین رای وایە ئەو شپرزەییە دەروونیەی رووبەرووی تاكەكانی كۆمەڵگا بۆتەوە هەموو هونەرەكانیشی گرتۆتەوە لەوبارەوە ووتی" بەپێی ئەوەی كۆمەڵگەی ئێمە  دارمان‌و كارەساتی كووشتن‌و لەناوبردنی مرۆڤی هەڵگرتوە، بەهۆی شەروو ناكۆكی‌و ململانێیی حزبی وایكردووە هەر لەمناڵێكەوە تا گەورەكانمان،  توشی شپرزەیی دەروونی‌و نەبوونی متمانە بەخود بووینەتەوە،  دەمارگیری توند وایكردوە، كۆمەڵگە بە ئاراستەی شەرانگێزی ناوببرێت‌و زەرەری عەقڵی درووستبكات،  تەنانەت ئەم شپرزەییە لەهونەری سینەما‌و هونەری میوزیك‌و گۆرانیشدا رەنگی داوەتەوە". لەبارەی ئەو شپرزەییە‌و هۆكارەكانی كە رووبەرووی كۆمەڵگا و هونەرەكەشی بوونەتەوە خاتوو دێرین دەڵێت" شپرزەییەكە مەبەستمە ئێمە بۆ هەمووشتێك بەكارهێنەرو هەڵگری هەڵەی شتەكانین، تەنانەت تا ئێستا نەمانتوانیوە رووداوو كارەساتە راستەقینەكان بكەینە فلمێكی سەرنج  راكێش.

گەرچی لەم لاو ئەولا كەمێك كار كراوە، بەڵام بەپێی پێوویست نیە، گەر سەیری فیلمی هاری پۆتەر بكەین،  دوای چەندینجار رەخنەی توندوو هەڵەیی سینەمایی زۆر دواجار بێ كۆڵ نەدان‌و بێ گوێدانە ماندوبوون سەركەووت، سینەماو ئەكتەرانی كورد بەداخەوە بەر نوێبوونەوە‌و خۆ دەوڵەمەندكردنی فكری ناكەون كەمترین خولی هونەری دەبینن، ئەگەر تەماشاكەین بەفیلم‌و دراماكانمانەوە دیارە كە چەندە شەر كاری گەری خستۆتە سەرمان، بۆیە من ناوی دەنێم شپرزەیی دەروونی‌و ناوەكی، تا ئێستا نەمان توانیوە دەرچین لەو قاڵبی شەروو توندوو تیژیانەی كە بەرمان كەوتووە".

دەربارەی ئەوەی كە باس لەسەره‌تای هونەری سینەما دەكرێت‌و سستی لەنێو كێشە دەروونیەكاندا ووتی" ناكرێت‌و قبوڵ نیە بڵێن ئێمە لەسەرەتاداین، چونكە بۆچی بۆ گۆرانی بێژێكی ئەلبانی ئامادەین بە ملیۆنەها دینار سەرف بكەین بۆ بۆ سینەمایەكی كوردی كاری جدی نەكەین، من ئەمە لەوەیا دەبینم كە ئەم دەستەڵاتە نایەوێ‌ ئەقڵی كورد پەرە پێبەن هەر دەیانەوێ لەرووی هونەركەشەوە شەڕی دەروونی ئاراستەی تاكی كورد بكەن".
هەروەها دەڵێت" سینەماكاران دەتوانن لەڕووی دەروونیەوە زۆر پەیامی تەندرووست بگەیەننە خەڵك، بەمەرجێك خۆیان لەژینگەیەكی ئارامدابن، بۆیە ئەو كارەی پێی هەڵدەستن دەبێ زۆر تەندرووستانەبێت‌و پەیامی هۆشیاری تێدابێت، بۆ ئەوەی خەڵك جارێكیتر خواستی بینینی بۆ شانۆ‌و فیلمی كوردی درووست بێتەوە، چونكە لای هەموان ئاشكرایە دراما توركیەكان خەریكە شۆرشێكی خراپ لەووڵاتی ئێمەدا دەكەن گەر ئێمە بەرهەمی خۆمانمان هەبێت ئاراستەكان‌و بیركردنەوەكان دەگۆرن بۆ باشتر نەك خراپتر، ئەمەش بەیەك دەنگی‌و كۆكردنەوەی بیرۆكەكانیان دەكرێت، دەبێت ئەو شەرە بەرنە پەرلەمان‌و بەش‌و پشكی هونەرهەبێت بۆ كێشەكانی سینەماكاران‌و پرۆژەكانیان سەرخەن بۆ بە دەستهێنانی هونەری پتەو باڵا، لاوازی دەنگی هونەرمەندانیش لێڕەدا بۆخۆی فاكتەرێكە بۆ پەراوێز خستی بەشێكی گەورە لەنەتەوەیەك چونكە ئێمە لەڕێی هونەرەوە ئەتوانین داهاتی ووڵاتێك بەدەست بهێنین، كەلتورو زمان‌و باری دەروونی تاكەكانیش بپارێزین.

دێرین علی كێ یه‌؟
سینەما‌و دەروون شیكاری پەیوەندییەكی پتەویان هەیە‌و لەرێگەی سینەماوە دەتوانرێت كاریگەری دەروونی لەسەر بینەر دابنرێت‌و شیكاری بۆ هەموو ئەو بارە دەرونییانە بكرێت كە مرۆڤ پێیەوە سەرقاڵبووە، دێرین عەلی  كە یەكێكە لەتوێژەرە دەرونیەكان‌و لەدایكبووی شاری سلێمانییە‌و ماوەی 15 ساڵ لەسوید ژیاوە‌و لەكۆتایی ساڵی 2014 بریاری گەرانەوەی داوە بۆ كوردستان، بۆ خزمەتكردن لەیەكێك لەبوارەكانی ژیاندا، سەرەتا لەپڕۆژەی ( مەنتۆر ئاند مەنتیز ) وەك توێژەرێكی دەروونی بەژداری دەكات، كە ژوری بازرگانی ووڵاتی سویدوو ژووری بازرگانی سلێمانی هەڵسابوون بەئەنجامدانی، مەنتۆرەكەی بەیەكەم هەڵبژێردرا‌و خۆشی بەیەكێك لەزۆر باشەكان لەماوەی ساڵەكەدا هەڵبژێردرا‌و بروانامەی نێودەوڵەتی لەسەر ئەو پرۆژەیە بەدەستهێناوە.

دواتر بەشداری لەپڕۆژەی هاوكاری دەروونی كردووە كە یونسێف هەڵسابوو بەئەنجامدانی ئەو پڕۆژەیە، كە ڕێكخڕاوی csi  وەری گرتبوو بۆ ماوەی شەش مانگ هاوكاری چەنده‌ها خێزانی ئاوارە‌و هاوكاری تەندرووستی دەروونی بۆ چەندەها منداڵی ئێزیدی‌ و منداڵی خێزانی سوری و عەرەبە مەسیحیەكان كراوە.

هەروەها ئەم خانمە وەك خۆبەخشێك لەڕێكخراوی فویچەر كاری كردووە‌و بۆ ماوەیەك بۆتە بەرێوەبەری ئیداری ڕێكخراوی هونەری لاوانی سەوز‌و سەرپەرشتیاری چەندین چالاكی هونەری‌و ژینگەیی كردووە، هەروەها وەرگرتنی كەیس‌و هاوكاری دەروونی خێزان‌و ئەو ژنانەی توندووتیژیان بەرامبەر كراوە‌و هاوكاری   دەروونی توشبوانی نەخۆشی شێرپەنجەبوە لەنەخۆشخانەی هیوا،  لەگەڵ ئەمانەشدا پێشكەشكاری بەرنامەی ئێكس مۆرنین بووە لەرادیۆی XFM نه‌وا  ‌و بەرنامەیەكی یاسایی لەرادیۆی دوارۆژ پێشكەش كردووە، پاشان لەپەیمانگەی ئینتەرچەینج لەوەرزی هاویندا وانەی دەروونی وتۆتەوە بەمناڵان، ئەم خانمە بەهۆی چالاكی‌و خزمەتەكانییەوە چەندین خەڵاتی ڕێز لێنان‌و بروانامەی وەرگرتووە لەناوەوەو دەرەوەی ووڵات، خاتوو دیرین لەئێستادا وەك نێرسێك‌و سایكۆلۆجستێك لەیەكێك لەقوتابخانەكانی شاری سلێمانی بەردەوامی بەكارەكانی دەدات‌و بریاریشیداوە لەداهاتویەكی نزیكدا وەك ئامادەكار‌و پێشكەش كار لەیەكێك لەكەناڵە تەلفزیونیەكانەوە ئەو ئامانجەی كە هەیەتی وەك دەروونزانێك لەبواری ژناندا رێنماییە دەرونیەكان پێشكەش بكات.

05/06/2019 11:32:53 | 110 | Print Friendly and PDF